Detaje të reja dalin në dritë nga ngjarja e rëndë e ndodhur në Durrës, ku Bedrie Loka, 41-vjeç u vetëvra pasi i hapën një profil fals në rrjetet sociale.
Burime bëjnë me dije se djali i madh i viktimës ka dëshmuar se e ëma ka qenë viktimë e dhunës, ndërsa një nga këto ditë, pas kthimit në shtëpi Xhemal Loka e kishte marrë në makinë Bedrien dhe e kishte dërguar në drejtim të Durrësit me shpejtësi duke i thënë se do e vriste, shkruan Euronews.al.
Avdi Bushi, vëllai i madh i Bedrie Lokut deklaron se motrën nuk ia vrau Tik Tok, por bashkëshorti i saj me të cilin nuk gëzoi asnjë ditë të bardhë gjatë 23 viteve martesë.
Ai thotë se motra u dhunua dhe kishte shenja në trup, ndonëse në ekspertizën mjeko-ligjore nuk raportohen shenja dhune.
“Bedrien e Vrau burri. Do i lutem shtetit shqiptar, policisë që të zbardh të çështjes. Ju lutem mos ma rëndoni fytyrën e motrës. 23 vjet martesë dhe 23 vite të bardha motra ime me atë burrë nuk i ka parë. Ai ka qenë vetëm burgjeve. Me 1 shtator më tha se nuk i kam mirë punët e Xhemal Loka. Dua që për fëmijët të ketë psikolog. Kam besim te policia prandaj s’kam vepruar. Motra kishte shenja dhune. Çuni i madh ka thënë se Bedrien e ka marrë Loka dhe e ka çuar me shpejtësi në Durrës”, tha ai.