Kreu i Kuvendit, Kadri Veseli, duke e uruar popullin gjerman me rastin e 26-vjetorit të ribashkimit të dy Gjermanive, ka thënë se “jemi krenar që Gjermania është një ndër aleatët tanë më të afërt”! Urimin e Veselit, të bërë përmes profilit të tij në Facebook, mund ta lexoni të plotë më poshtë.
“Me rastin e 26 vjetorit të ribashkimit të Gjermanisë dëshiroj të dërgoj urimet më të përzemërta për popullin mik të Republikës Federale të Gjermanisë. Ky vend i është gjetur popullit tonë në kohët më të vështira duke u bërë strehë e pjesës më të madhe të bashkatdhetarëve tanë që u detyruan ta braktisnin vendlindjen prej robërisë. Gjermania ka qenë gjithashtu faktor kyç në çlirimin e Kosovës, në fitoren e pavarësisë dhe vazhdon të na ndihmojë në mënyrë bujare në procesin e shtet-ndërtimit dhe të integrimeve Evropiane. Ne jemi krenar që Gjermania është një ndër aleatët tanë më të afërt dhe gëzohemi për çdo arritje apo suksesi të këtij vendi. Po ashtu jemi krenar që jemi të rreshtuar në të njëjtin front të luftës kundër terrorizmit dhe që në kuadër të anëtarësimit në NATO e BE partneriteti ynë ka për të qenë edhe më i ngushtë”, ka shkruar Veseli. /Telegrafi/
