Kryetari i Partisë Demokratike të Kosovës, Kadri Veseli, ka thënë se lista e PDK-së për deputetë do të jetë fituese në zgjedhjet e tetorit.
Ai ka thënë se është shumë krenar me PDK-në, që sipas tij, po ia ofron vendit njerëzit më të zotë, ata që bartin sukseset e së kaluarës dhe të rinjtë që kanë vizion për të ardhmen.
“Lista jonë e deputetëve është një listë që do t’i fitojë zgjedhjet, do ta luftojë korrupsionin, do t’i mbajë të rinjtë këtu dhe do ta ndërtojë të ardhmen e Kosovës.
Më shumë se gjysma e kandidatëve garojnë për herë të parë, ndërsa më shumë se 40 janë të rinj e të reja. Dhe askush me aktakuza për korrupsion. Kjo listë flet edhe për reformat në PDK. Prandaj, jam shumë krenar”, ka shkruar Veseli në Facebook.
Ai ka falënderuar të gjithë qytetarët për mbështetjen e dhënë në Konventën Festive të PDK-së, ai ka shtuar se kjo ngjarje do të mbetet e paharrueshme./Telegrafi/
