Kryetari i Kuvendit të Kosovës, Kadri Veseli i shoqëruar nga drejtori i Institutit të mjekësisë ligjore, Arsim Gërxhaliu ka vizituar vendin ku po ruhen eksponatet e rrobave të të vrarëve dhe artefaktet e personave të zhdukur gjatë luftës në Kosovë.
Veseli ka premtuar se do të ketë drejtësi për këtë.
“E kemi për obligim që këto rroba të fëmijëve të vrarë të mos i varrosim. Ato do të vendosen në Muzeun e Gjenocidit. Ne duam paqe, nuk duam konflikt, duam të ardhme, por nuk do ta lëmë askënd të na nguc. Drejtësia nuk ka qare pa ndodhë”, ka thënë Veseli.
Ai ka shtuar se do të jetë e pafalshme nëse Bashkësia Ndërkombëtare nuk e përkrah krijimin e tribunalit për krimet serbe.
“Do të jetë e pafalshme nëse bashkësia ndërkombëtare nuk e përkrahë iniciativën tonë për tribunal ndërkombëtar. Jam i sigurt se për aq sa ka njerëz , dritë, diell në këtë botë do të ndodh edhe drejtësia edhe tribunali ndërkombëtar për gjenocidin serb”, ka thënë Veseli. /Telegrafi/
