Telegrafi

Pas dorëheqjes së amerikanëve nga bordi i Agjencisë së Pronës, reagon Veseli: Nepotizmi po cenon rëndë marrëdhëniet me aleatët tanë

Kryetari i Kuvendit të Kosovës, Kadri Veseli, ka thënë se dorëheqja e miqve amerikanë dhe britanikë nga Bordi i Agjencisë Kosovare të Krahasimit dhe Verifikimit të Pronës është një lajm i keq dhe se për këtë duhet të alarmohemi të gjithë.

Në reagimin e bërë në Facebook, Veseli ka shkruar se liria, pavarësia dhe proceset e shtetndërtimit të Kosovës janë arritur vetëm falë mbështetjes së pakursyer të aleatëve dhe, po ashtu, vetëm me ndihmën e tyre mund t’i përballim sfidat që kemi përpara, transmeton Telegrafi.

Lexo po ashtu SHBA ndjek shembullin e britanikëve, tërhiqet nga Bordi i Agjencisë së Pronës

Ndër tjera, ai ka thënë se nepotizmi jo vetëm që po e dëmton shtetin tonë dhe po i detyron të rinjtë të ikin nga vendi, por edhe po i cenon rëndë marrëdhëniet jetësore me aleatët  më të ngushtë.

Në fund, ai ka pohuar se kjo ngjarje është dëshmi e qartë se lufta ndaj nepotizmit dhe korrupsionit është një domosdoshmëri, duke shtuar se ai ka nisur këtë luftë me vendosmëri të madhe dhe që do t’i shkojë deri në fund. Në mënyrë që të ndërtohet një e ardhme më e mirë për Kosovën./Telegrafi/