Kryetari i Kuvendit të Kosovës, Kadri Veseli, ka nënshkruar sot vendimin e miratuar nga Kuvendi i Kosovës për Statutin e Trepçës.
Ky vendim i nënshkruar nga kryeparlamentari Veseli rikonfirmon pronësinë 100 për qind të Republikës së Kosovës në kombinatin më të madh metalurgjik në Kosovë, Trepça, e cila tani e tutje do të jetë Shoqëri Aksionare me pronarë të 80 për qind nga Qeveria e Kosovës dhe 20 për qind pronarë të punësuarit e Trepçës.
Një ditë më parë, është diskutuar për idenë e Serbisë se për Trepçën mund të diskutohet në dialogun Kosovë-Serbi por reagimi ndaj kësaj teme ka qenë i menjëhershëm.
“Trepça, as nuk ka qenë, as nuk është dhe as nuk do të jetë çështje e hapur në dialogun me Serbinë. Me këtë gjuhë, BE është duke e rrënuar çdo perspektivë të dialogut dhe fqinjësisë së mirë. Trepça është e drejtë natyrore e shtetit të Kosovës. Sot dhe përgjithmonë”, ka thënë kryetrai i Kuvendit Kadri Veseli. /Telegrafi/
