Kandidati i PDK-së për Kryeministër, Kadri Veseli, në një tubim me mijëra qytetarë në Ferizaj, ka thënë se është e jashtëzakonshme të jesh në sheshin “Adem Jashari”, në këtë shesh lirie, në këtë shesh ku rinia e ka mbushur çdoherë kur i është deshtë atdheut.
Veseli ka thënë se Ferizaj është qytet i rinisë, i atdhetarëve dhe i ndërmarrësisë.
“Jo larg nga ne këtu është një vend që njihet në Kosovë dhe krejt botën. Kampi i Bondstillit, një simbol i partneritetit tonë të fortë me Amerikën. Ne duhet t’i rikthehemi këtij partneriteti. Ne duhet t’u japim shpresë qytetarëve dhe kjo është puna ime dhe unë do ta bëj këtë”, ka thënë Veseli.
Ai ka thënë se Kosovës sonë, të rinjve, burrave dhe grave, iu duhet përjetësisht partneriteti me Shtetet e Bashkuara të Amerikës.
“Në ardhjen e parë presidenti Bill Clinton tha: Ne fituam luftën së bashku, por vetëm ju mund ta fitoni paqen. Sot unë them: Ne e fituam luftën, ne shpallëm pavarësinë, por ne duhet të mposhtim korrupsionin dhe nepotizmin. Dhe ne do ta bëjmë këtë së bashku me miqtë tanë amerikanë”, ka thënë Veseli.
Duke iu drejtuar kryetarit Agim Aliu, Veseli ka premtuar se pas 6 tetorit, çdo projekt që e ka Ferizaj, çdo iniciativë do ta përkrah deri në fund.
“Kryetari e ka shumë për qejf e për zemër, por e kanë edhe të gjithë kandidatët e PDK-së për deputetë të Ferizajt. Në mandatin tjetër do ta ndërtojmë urën e hekurudhës, që do ta bashkojë qytetin e Ferizajt”, ka thënë ai.
Kandidati i PDK-së për Kryeministër, Kadri Veseli, ka thënë se Kosova ka nevojë për zhvillim, për ecje përpara, jo për stangim.
Veseli ka thënë se këto janë zgjedhje kritike për të ardhmen e Kosovës dhe alternativa e duhur është e qartë.
Ai ka thënë se populli duhet të zgjedhë midis një qeverie që e udhëheq PDK-ja me të si Kryeministër, e cila do të forcojë partneritetin tonë me miqtë amerikanë apo një koalicion i izolimit dhe korrupsionit, i Kurtit dhe Mustafës, që nuk do të zhvillojë ekonominë, por do të bazohet në korrupsion dhe nepotizëm.
“Qeveria që unë do të drejtoj do ta luftojë korrupsionin dhe nepotizmin, do ta zhvillojë ekonominë, do të krijojë vende pune këtu dhe do të ofrojë një të ardhme më të mirë për të rinjtë tanë”, ka thënë Veseli.
Lideri i PDK-së ka thënë se do të fitojnë, por nuk duhet të vetëkënaqemi dhe duhet ta përçojmë mesazhin te të gjithë, që së bashku ta ruajmë shtetin tonë, të ardhmen tonë euroatlantike.
“Vetëm të bashkuar mund ta arrijmë. Sa më e fortë është Partia Demokratike e Kosovës, aq më e fortë është Kosova. Sa më e fortë është Kosova, aq më e dobët është Serbia”, ka thënë ai.
Veseli u ka kërkuar ferizajasve që ta votojnë Partinë Demokratike të Kosovës dhe numrin 112 për t’ia rikthyer partneritetin dhe shpresën Kosovës.
