Sot përfundon java e tretë e grevës së SBASHK-ut në arsim, të cilët po kërkojnë rritje pagash për mësimdhënësit.
Mirëpo një lajm të mirë e ka dhënë kryeparlamentari Kadri Veseli, i cili ka thënë se të hënën fillon mësimi.
“Urime mësimdhënës dhe nxënës të dashur. Mësimi fillon të hënën”, ka shkruar Veseli në Facebook.
Ky mesazh i Veselit për nxënësit dhe mësimdhënësit ka ardhur pas një takimi që ka zhvilluar me përfaqësuesit e SBASHK-ut dhe kryeministrin Ramush Haradinaj.
Në anën tjetër edhe kryeministri, Ramush Haradinaj ka bërë të ditur se është arritur marrëveshja me SBASHK-un për ndërprerjen e grevës.
“Sot, në takim me kryetarin e Kuvendit Kadri Veseli dhe përfaqësuesit e SBAShK-ut përfunduam marrëveshjen me sindikatat dhe u dakorduam që mësimi të fillojë të hënën. Dialogu ynë do të vazhdojë në funksion të përmirësimit të sistemit arsimor në vend. Urime nxënës!”, ka shkruar Haradinaj në Facebook.
Pas këtij takimi, kryetari i SBASHK-ut, Rrahman Jasharaj, ka deklaruar se marrëveshja e re e arritur me kryeparlamentarin dhe kryeministrin, ofrohet shumë afër kërkesave të tyre.
“Ishte kënaqësi, dje filluam një raund të ri të diskutimeve. Falënderoj ministrin Hamza. Dhe sot u takuam për arritjen e një marrëveshjeje. Marrëveshja e re është një lëvizje e re dhe na ofron shumë afër kërkesave tona”, tha ai./Telegrafi/
