Kryetari në detyrë i PDK-së, Kadri Veseli, ka premtuar se do të punojë që Partia Dekmokratike e Kosovës të jetë motor i ideve që krijojnë zhvillim ekonomik, që krijojnë vende pune, që e bëjnë Kosovën një vend më të mirë.
“Ne kemi pasur ide të mira në cikle të tjera zgjedhore dhe na kanë mbetur edhe dy vjet që të realizojmë disa nga premtimet, që nga investimet në energjetikë e deri tek krijimi i vendeve të reja të punës. Ju premtoj se synimi im dhe dedikimi im do të jetë pikësëpari tek zhvillimi i qëndrueshëm ekonomik”, ka premtuar Veseli.
Sikurse partitë e tjera të qendrës së djathtë, ai ka thënë se edhe PDK-ja beson se ekonomia e tregut është sistemi i vetëm që mundëson përmbushjen e lirive dhe të drejtave të njeriut dhe siguron rritjen ekonomike dhe standarde të larta jetese.
“Puna e PDK-së në kuvend, në komuna, në qeveri dhe në çdo institucion tjetër do të jetë e fokusuar në ngritjen e standardit të qytetarit të Republikës së Kosovës, e jo vetëm të anëtarësisë së PDK-së”, ka thënë Veseli.
Këto pika dhe shumë tjera, Veseli ka thënë se do t’i shpalos më hollësisht gjatë ditëve në vijim.
Ai pasi shpalli kandidaturën për Kryetar të Partisë Demokratike të Kosovës, anëtarëve të PDK-së ua kërkoj edhe përkrahjen, besimin dhe votën në kuvendin zgjedhor, që do të mbahet më 7 maj. /Telegrafi/