Një vajzë kishte vendosur që ditëlindjen e 18-të ta festojë duke u hedhur me parashutë së bashku me instruktorin, por në një moment parashuta e tyre nuk ishte hapur dhe kontaktin e parë që e patën me tokën, humbën jetën.
Vanessa Ivonne Melendez Cardenas sapo kishte mbushur 18-vjet, dhe kishte vendosur ta festojë këtë datë të rëndësishme duke u hedhur me parashutë nga 400 metra lartësi në Tequesquitengo në Meksikë, transmeton Telegrafi.
Videoja amatore e publikuar më poshtë shfaq momentin kur nxënësja e shkollës së mesme dhe instruktori Mauricio Gutierres Castillo, 34-vjeç, fillojnë të bien me shpejtësi të madhe nga qielli.
Përveç dyshes edhe katër persona tjerë ishin hedhur me parashutë, por kishin zbritur në tokë pa ndonjë problem. Kurse një burrë dëgjohet në video duke pyetur një vajzë nëse Melendez Cardenas është gati për hedhje.
Megjithatë pa kaluar pak sekonda shihet parashuta e 18-vjeçares dhe instruktorit duke rënë më shpejtësi të madhe në tokë, dhe në një moment përplasen fuqishëm.
Autoritetet kanë arritur të gjejnë trupat e Melendez Cardenas dhe Gutierres Castillo në një fushë të gjelbëruar. Ndërkaq kompania meksikane që kishte organizuar hedhjen me parashuta, pretendon se rënia fatale nuk ishte shkaktuar për shkak të problemit të parashutës.
Jorge Gaitan, drejtor i Albatros Parachuting pretendon se aksidenti ishte shkaktuar nga njëri prej viktimave. /Telegrafi/
