Në orët e para të mëngjesit të sotëm një sasi tritoli ka shpërthyer në makinën e Albert Kuliçit, zv/drejtues në Prokurorinë e Vlorës.
Hetimet e autoriteteve për këtë ngjarje sapo kanë nisur, ndërkohë që puna e Kuliçit si prokuror pritet të jetë pista kryesore ku do të përqëndrohen hetimet.
Me shkrirjen e Prokurorisë së Krimeve të Rënda, për shkak të krijimit të SPAK, kjo çështje do të hetohet nga një prokurori e zakonshme.
Albert Kuliçi, me origjinë nga Tropoja, ka patur në dorë vitet e fundit çështjet më të bujshme në Vlorë, duke filluar nga skandali i madh i tjetërsimit të pronave në Karaburun dhe Zvërnec, ku i përfshirë ishte edhe biznesmeni Pëllumb Petritaj, deri te koncesioni i parkingjeve në qytetin bregdetar, i cili u anulua pas u konstatuan një seri shkeljesh.
Kuliçi ka hetuar edhe një aferë në Albpetrol, si dhe ka kërkuar vendosjen e sekuestros për një pallat 11 katësh në Vlorë, për të cilin u akuzua për shpërdorim detyre ish-kryebashkiaku Shpëtim Gjika.
Prokurori Kuliçi nuk i është nënshtruar ende procesit të vetting-ut.
Vendosja e tritolit në makinën e prokurorit Kuliçi, teksa ajo ishte parkuar, është rasti i dytë brenda një muaji i gjysmë që sulmohet një prokuror, pas rastit të atentatit ndaj Arjan Ndojit në Durrës.
Në emisionin e fundit, Top Story solli një dokumentar mbi të gjitha rastet e sulmeve ndaj njerëzve të drejtësisë në 29 vitet e fundit: “Plumba mbi drejtësinë”. /tch/
Për të parë videon klikoni KËTU