Ministri i Punëve të Brendshme të Kosovës, Agim Veliu, ka vizituar gjatë ditës së sotme Gjilanin pas vrasjes së pesëfishtë që ka ndodhur ditën e martë.
Veliu është shoqëruar nga kryetari i Gjilanit, Lutfi Haziri, i cili përmes një shkrimi të bërë në profilin e tij zyrtar në Facebook ka falënderuar ministrin për vizitën.
“E falënderoj ministrin e Brendshëm, mikun tim Agim Veliu, i cili sot është në vizitë për të parë nga afër zhvillimet pas tragjedisë që e përjetuam dje. Trupat e pajetë janë në Institutin e Mjekësisë Ligjore për obduksion”, ka shkruar Haziri, përcjell Telegrafi.
I pari i Gjilanit ka bërë të ditur se janë të pritje të një pjesë të familjes Bllaca të vijnë nga Kanada në Gjilan, duke shtuar se po përgatiten për ceremoninë e varrimit bashkë me komunitetin e Cernicës dhe familjen Bllaca.
“Po ashtu, i falënderoj të gjitha institucionet e shtetit për solidaritetin e madh për Gjilanin për t’ua lehtësuar dhembjen”, vijon shkrimi i Hazirit.
Në ngjarjen tragjike të së martës, dyshohet se zyrtarja policore V.B ka privuar nga jeta prindërit, dy vëllezërit dhe më pas vetën. Prokuroria ka bërë të ditur se vrasjen janë kryer me revolen e Policisë së Kosovës që kishte poseduar viktima V.B.
Ndërkohë gjatë ditës pritet të përfundojë edhe obduksioni për pesë anëtarët e familjes Bllaca./Telegrafi/
