Kryetari i Komunës së Podujevës, Agim Veliu, gjatë vizitës zyrtare në Bashkinë Westerstede të Gjermanisë, ka takuar sot kryetarin e kësaj bashkie Klaus Gross.
Gjatë vizitës që po realizon në Bashkinë Westerstede të Gjermanisë, kryetari i Komunës së Podujevës, Agim Veliu, është pritur sot në një takim nga Klaus Gross-kryetar i Westerstedes.
Në takimin e kryetarëve Veliu dhe Gross, ku ishin të pranishëm edhe përfaqësues të bizneseve dhe kompanive gjermane nga kjo zonë, është biseduar për ecurinë e bashkëpunimit të deritashëm dhe gjetjen e formave për investime konkrete të kapitalit gjerman në Podujevë.
Në këtë takim kryetari Veliu mori premtime nga nikoqirët se ky bashkëpunim do të konkretizohet me investime në fushën e zhvillimit ekonomik, bujqësi, arsim, shëndetësi, mbrojtje të ambientit dhe shërbime publike.
Me qëllim të konkretizimit të bashkëpunimit dhe investimeve në fusha të caktuara, një grup i biznesmenëve dhe ekspertëve të Westerstedes së shpejti do ta vizitojë Komunën e Podujevës.
Vizita e kryetarit Veliu në Westerstede është realizuar në kuadër të një bashkëpunimi të nisur më herët në mes Komunës së Podujevës dhe kësaj bashkie gjermane.
Bashkëpunimi i deritashëm është konkretizuar me donacione nga Westerstede për Brigadën e Zjarrfikësve, arsimin dhe shëndetësinë e Podujevës. /Telegrafi/