Kryetari i Bashkisë së Tiranës, Erion Veliaj, është shprehur i vendosur në lidhje me prishjen e shtëpive të banorëve të Bregut të Lumit. Sipas tij, prishja e këtyre banesave do t’i hapë rrugë projektit të Bulevardit të Ri.
Rezistencën e banorëve anekënd Tiranës për të mos i prishur shtëpinë, Veliaj e ka quajtur “Astirizim të shoqërisë”. Ai ka thënë se shtëpitë do të prishen dhe se banorët do të marrin në këmbim banesa sociale.
“Sot ka nisur lirimi i brezit të parë të shtëpive. Do të vazhdojmë kështu çdo ditë. Në Tiranë nuk do të lejojmë ‘Astirizimin’ e shoqërisë: kap një deputet budalla, gjej dhe nja dy media të politizuara, dhe mbaj gjithë shoqërinë peng. 99.99% e këtij qyteti do të ecë përpara, duhet që gjërat të bëhen me drejtësi dhe që taksat të përdoren me kujdes”, deklaroi Veliaj.
“Pyetja është: i vajte ti lumit, apo erdhi lumi te ty? I vajte ti lumit! Ajo që kemi propozuar është: Kush ka ndërtuar në shtrat të lumit, aty ku përfundon bulevardi, do marrë banesë sociale. Pra, banesë për banesë. Janë shumë herë më të mira se ato që i merr lumi. Ama, t’u marrësh lekët e shkollave taksapaguesëve sepse ke ndërtuar pa leje në breg të lumit, nuk shkon. Edhe Sali Berisha që e shkatërroi këtë shtet, edhe ai nuk i përfshiu në VKM, që s’e kishte problem fare ta shkatërronte edhe më shumë. Por, kur edhe ai pati një limit të çmendurisë së vet, do të thotë që ne të tjerët duhet ta kemi patjetër një limit. Shtëpi për shtëpi, asnjë njeri jashtë, asnjë njeri i pastrehë”,tha kryebashkiaku./Lapsi.al/