Dhoma e posaçme sqaron se nuk e gjykoi vendimin e Gjykatës Komunale për shpronësimin e 36.5 hektarëve tokë, pasi ai ishte i formës së prerë, por hodhi poshtë vetëm ankesat e AKM-së për anulimin e shpronësimit, pasi nuk pati kompetenca që të prishë një vendim të formës së prerë.
Kryetari i Dhomës së Posaçme, Sahit Sylejmani, thotë se nuk kanë kompetenca për të prishur vendimet e plotfuqishme e as ta gjykojnë për merita vendimin kur ai është i formës së prerë, pavarësisht nëse është i ligjshëm ose jo.
Por, dosja e kësaj lënde është zhvendosur në Prokurorinë Speciale, me të cilën po merren gjyqtarët e EULEX-it.
Javën e kaluar edhe u ngrit padia për 23 të akuzuarit, që lidhet me tjetërsimin e pronave të shtetit, në mesin e të cilëve edhe gjyqtarja që vendosi për lëndën, pasi prokuroria dyshon se vlera e dëmit që iu shkaktua shtetit ishte 100 milionë euro.
Por Sulejmani ka pranuar se kanë mijëra lëndë të tilla që pronarët e tyre janë kontestues e po ashtu edhe mënyra e kalimit nga pronat e shtetit në private.
Aktualisht në sirtarët e kësaj gjykate janë 23 mijë lëndë që presin për t’u zgjidhur.