Telegrafi

Varroset kritiku i Putinit, Alexei Navalny – mijëra njerëz dolën në rrugë për t’i dhënë lamtumirën e fundit pavarësisht kërcënimeve të Kremlinit

Nol Elshani

Alexei Navalnyt i është dhënë lamtumira e fundit në shtetin rus.

Ish-kreu i opozitës është varrosur në varrezat Borisovskoye të kryeqytetit rus, Moska, raporton skynews.

Në varreza, në momentet kur arkivoli po hynte në ‘banesën e fundit’, dëgjoheshin thirrjet “Na fal. Nuk do të harrojmë!”.

Theksojmë se mijëra njerëz dolën në rrugët e qytetit për t’i dhënë lamtumirën e fundit 47-vjeçarit, i cili gjatë gjithë jetës luftoi për ardhjen e demokracisë në Rusi.

Lexo po ashtu Vdiq në burg, por kush ishte opozitari rus Alexei Navalny

Ekipi i ish-kritikut të Kremlinit ka njoftuar se vetëm 300 njerëz u lejuan të marrin pjesë në ceremoninë e organizuar në kishë.

Kujtojmë se ai vdiq në një burg rus në Arktik, ku po vuante dënimin në saje të akuzave të sajuara.

Ndryshe, Navalny i lindur në një fshat në perëndim të Moskës, ai u bë ndoshta kritiku më i madh i presidentit rus, Vladimir Putin.

Aktivizimi i tij politik, duke përfshirë hetime të gjera për korrupsionin e nivelit të lartë dhe kandidimin për të qenë kryebashkiak i Moskës, i dha atij famë dhe shumë besonin se ai përbënte një kërcënim për Putinin.

Ai u sëmur rëndë në vitin 2020 gjatë një fluturimi nga Siberia në Moskë ndërsa në gjendje koma u dërgua për shërim në kryeqytetin gjerman, Berlin.

Lexo po ashtu Navalny për herë të fundit u pa i gjallë gjatë ditës së djeshme - shfaqen pamjet ku shihet duke buzëqeshur dhe u tallur me gjyqtarët

Mjekët gjermanë konfirmuan se ai ishte helmuar me novichok – një agjent nervor i kohës sovjetike – dhe shërimi i tij zgjati me muaj.

Pavarësisht rrezikut, Navalny zgjodhi të kthehej në Rusi, ku më vonë u arrestua dhe u dënua me akuza që ai thotë se janë të motivuara politikisht dhe mbeti në burgjet ruse deri në vdekje.

Ndryshe, udhëheqësi i opozitës ruse, Aleksei Navalny, e ka fituar Çmimin Sakharov, një shpërblim prestigjioz që ndahet nga Parlamenti Evropian për mbrojtësit e të drejtave të njeriut. /Telegrafi/