Instituti i Shëndetit Publik do të dërgojë për analiza në laboratorë të specializuar mostra të pacientëve për të zbuluar nëse varianti i ri i COVID-19, Omicron qarkullon në Shqipëri.
Ministrja e Shëndetësisë Ogerta Manastriliu u bëri thirrje qytetarëve që të vijojnë me procesin e vaksinimit.
Ajo deklaroi se do të bëhet një vlerësim i gjithë masave aktuale për frenimin e pandemisë, si dhe vendosja e maskave në ambientet e brendshme.
“Është e rëndësishme të vijojmë vaksinimin edhe në raport me variantin e ri Omicron që tashmë ka shqetësuar botën. Jo duke i vendosur vendet në panik por i ka vendosur në një gatishmëri të shtuar të gjitha vendet, ashtu sikurse edhe ne”, tha ministrja Manastirliu.
Që nga nisja e procesit të vaksinimit në Shqipëri janë kryer në total 2.103.351 doza. Nga këto, 1.072.645 janë doza të para; 961.013 doza të dyta dhe 67.381 doza të treta.