Van der Vaart sulmon përsëri Maguiren rreth aftësive si futbollist: Ai qesh me gruan e tij sa i dobët është dhe sa shumë paguhet

Rafael van der Vaart bëri shaka me kapitenin e Manchester Unitedit, Harry Maguire, i cili sipas holandezit shkon në shtëpi dhe i thotë gruas së tij se nuk është aq futbollistë i mirë, por fiton shumë.

Ish-reprezentuesi holandez i cili ka luajtur për Ajaxin, Real Madridin dhe Tottenhamin ka analizuar fitoren 5-2 të United ndaj Bournemouth.

Mbrojtësi i Anglisë, Maguire ishte jashtëzakonisht i tronditur në lojë dhe ishte fajtor në golin e parë të Bournemouth, pasi u turpërua nga Junior Stanislas.

Lexo po ashtu Stanislas ‘rikthen Maguiren te Leicester City’ me një driblim fantastik dhe kalon Bournemouthin në epërsi ndaj Unitedit

Performanca e tij bëri që Van der Vaart të lëshoj një mal me kritika mjaft të egra për aftësitë e tij futbollistike.

Ish-mesfushori i Hamburgut nuk është aspak një tifoz i Maguires pasi ai ka sulmuar ashpër për herë të dytë ish-qendërmbrojtësin e Leicester Cityt.

Në tetor, ai bëri disa krahasime rreth mbrojtësit 27-vjeçar dhe pretendoi se Virgil van Dijk vlen 300 milionë euro nëse Marugire vlen po aq sa 80 milionë eurot e paguara nga Unitedi verën e kaluar.

“Kur shkoj të shoh një klub amator të dielën, unë mund të gjej tre lojtarë që mund të luajnë sikurse ai”.

“Unë dua të them diçka. Mund të jetë pa kuptim ta thuash por ai nuk do ta dëgjojë atë sidoqoftë. Ne po flasim për një nënshkrim prej 90 milion eurosh këtu. Atëherë Van Dijk vlen 300 milionë euro”, kishte thënë Van der Vart në tetor.

Ndërsa, tani akuzat e holandezit në drejtim të anglezit kanë qenë edhe më të mëdha.

“Mendoj se Maguire shkon çdo ditë në shtëpi dhe i thotë gruas së tij: “Unë jam një futbollist m***, por fitoj kaq shumë. Ata vërtet besojnë se jam i mirë. Unë vërtet mendoj kështu, ai qesh me të gjithë”, ka deklaruar holandezi. /Telegrafi/