USAID-i dhe UNICEF-i sigurojnë ndihmë shtesë për familjet në nevojë gjatë COVID-19

Kemajl Berisha

5 years ago

Ambasadori i SHBA-së në Prishtinë Phillip S. Kosnett, i shoqëruar nga ministri në detyrë i Shëndetësisë Arben Vitia dhe koordinatorja e OKB-së për Kosovën Ulrika Richardson, vizituan sot qendrën shpërndarëse të Kryqit të Kuq në Prishtinë.

Vizita shënoi nisjen zyrtare të partneritetit midis Agjencisë̈ së Shteteve të Bashkuara për Zhvillim Ndërkombëtar (USAID-it) dhe Fondit të Fëmijëve të Kombeve të Bashkuara (UNICEF-it) në luftën kundër COVID-19.

“SHBA kanë hyrë në partneritet me UNICEF-in në Kosovë për të ndihmuar familjet dhe institucionet që janë në vijën e parë të kësaj beteje. Vetëm një përgjigje e unifikuar ndërkombëtare është efektive kundër këtij kërcënimi global. Së bashku mund të mposhtim COVID-19,” tha ambasadori Kosnett gjatë vizitës.

Qeveria e SHBA-së përmes USAID-it, ka ndarë 1.1 milion dollarë për të ndihmuar Kosovën në luftën kundër pandemisë COVID-19 dhe zbutjes së pasojave të saj.

Kompletet higjienike për familje, të financuara nga Qeveria amerikane, do të shpërndahen në 26 komuna. Përveç kësaj, kompletet e higjienës për familje dhe foshnje për gratë shtatzëna të margjinalizuara dhe fëmijët e tyre do të shpërndahen në 31 komuna, ndërsa kompletet higjienike për qendrat mjekësore familjare do të shpërndahen në të 38 komunat.