Rektori i Universitetit Prishtinës, Enver Hasani e ka përshkruar këtë bashkëpunim si teknik. “Ky është bashkëpunim teknik. Dokumentet e shqiptarëve kam pasur nevojë që t’i marrë sepse njerëzit në mungesë të tyre falsifikojnë. Kemi dy diploma të cilat ka kërkuar Shqipëria që t’i verifikojmë a janë falso a jo. Unë se kam ditur se a janë falso pasi ka qenë punë qorras deri tash. Tani kur e kam dokumentacionin tash e di për secilin a ka qenë apo jo student i këtij universiteti. Këtu nuk ka lidhje politike”, ka thënë Hasani.
Universiteti në veri, ka një licencë të përkohshme nga ndërkombëtarët por nuk është njohur asnjëherë nga institucionet e Republikës së Kosovës pasi ai punon me plan-programe të Ministrisë së Arsimit të Serbisë. Hasani thekson se kthimi i dokumentacionit nuk ka të bëjë me njohjen ose jo të këtij universiteti, pasi ajo është punë e politikanëve dhe jo e tij.
“Unë as nuk njoh e as nuk çnjoh gjërat që ekzistojnë. Për këtë pyetni politikanët a ekziston universiteti në veri apo jo dhe çfarë statusi ka”, vijoi Hasani.
Me ndihmën e organizatës SPARK, UP ka kthyer në arkivat e saj, nga Universiteti në veri, 11.529 dokumente, prej tyre 5.125 dokumente origjinale të shqiptarëve, ndërsa ka dërguar në veri 37.506 dokumente të serbëve. /Alsat/