Paul Pogba është pothuajse lojtari më i ri i Manchester Unitedit, me rreth 125 milionë euro që klubi anglez do të paguajë për shërbimet e 23-vjeçarit i cili po “çmend” gjithë kontinentin.
Sakaq, sikur të mos mjaftonte ky transferim i bujshëm, “Djajtë e kuq” po mendojnë për një tjetër francez. Sipas prestigjiozes “France Football”, në Manchester ende nuk kanë hequr dorë nga mesfushorit i West Hamit, Dimitri Payet.
Lojtari i cili shpërtheu me performancat e tij të shkëlqyera në Evropianin 2016 ka qenë prej kohësh një synim i drejtuesve në “Old Trafford”.
Deri tani, “France Football” shkruan se Interi përbën një kërcënim relativisht të madh, që Payet të mos vishet i kuq. Në Itali raportohet se klubi zikaltër dëshiron të blejë një lojtar të kushtueshëm dhe i përzgjedhuri është pikërisht francezi.
Natyrisht, emri dhe mundësitë për të fituar janë argumente për “Djajtë e kuq”, por shanset për të luajtur janë më të shumta në Milano. Në fund, gjithsesi, vendimin e merr vetë Payet. /Telegrafi/