Unaza e Tupac Shakur në formë kurore, të cilën ai e mbante pak para se të vdiste, u shit për gati një milion euro të martën, duke u bërë objekti më i vlefshëm hip-hop i shitur ndonjëherë në ankand.
Sotheby’s në New York e shiti unazën si pjesë e një shitjeje të madhe të artefakteve hip-hop, duke përfshirë letra me autografe nga Shakur dhe një kasetë demo për këngën e tij “Trapped”, sipas një njoftimi për shtyp nga shtëpia e ankandit.
Para ankandit, unaza vlerësohej të shitej nga 200 deri në 300 mijë euro.
Pjesët, të destinuara për të përkujtuar 50-vjetorin e zhanrit muzikor, përfshinin gjithashtu kujtime nga shumë emra të tjerë të paharrueshëm – Mos Def, De La Soul dhe Wu-Tang Clan, për të përmendur disa.
Unaza prej ari 14 karatësh, me diamante dhe rubin, përmban një mbishkrim në anë që lexon “Pac & Dada 1996” – një referencë për fejesën e tij me aktoren Kidada Jones.
Sipas njoftimit për shtyp, Yaasmyn Fula, kumbara i artistit, e ofroi unazën në ankand, duke i thënë Sotheby’s se ishte projektuar me porosi nga Pac dhe ishte montuar nga argjendaritë në New York pas muajve të tij prapa hekurave dhe marrëveshjes së tij me Death Row Records.
Unaza u shfaq gjithashtu në gishtin e tij gjatë 4 shtatorit 1996, në “MTV Video Music Awards” – shfaqja e tij e fundit publike para vrasjes së tij tragjike tre ditë më vonë në Las Vegas. /Telegrafi/
