Vendimi i Këshilli Kombëtar është se, nëse deri të hënën, më 15 dhjetor, nuk bëhet pagesa e 44 eurove për punëtorët e qendrave të mjekësisë familjare, atëherë më 16 dhjetor, të martën, do të mblidhet në ora 12:00 Këshilli Kombëtar për të vendosur fillimin e grevës në të gjitha institucionet shëndetësore publike të Republikës së Kosovës.
Në takimin e Këshillit Kombëtar kanë qenë të ftuar edhe përfaqësuesit e Ministrisë së Shëndetësisë, dhe është autorizuar nga sekretari i përhershëm, për të marrë pjesë në takim, Dr. Curr Gjocaj, drejtor i departamentit të shërbimeve shëndetësore në Ministrinë e Shëndetësisë. Anëtarët e Këshillit Kombëtar kanë shprehur indinjatën e tyre, dhe kanë kërkuar edhe përgjegjësi politike për moszbatim të marrëveshjes.
Asllan Bajrami, kryetar i FSSHK-së, ka theksuar se " Marrëveshja nuk përcakton burimin e të hyrave për punëtorët e QMF-ve, dhe as nuk jemi marrë vesh që 44 eurot të jenë shujtë. Ne kemi premtime të vazhdueshme nga Ministria e Shëndetësisë për zbatim të marrëveshjes por kjo nuk ka ndodhur. Ne sot duhet të marrim një vendim për të përshkallëzuar aktivitetin tonë sindikalë, pra zhvillimin e grevës, nëse brenda një afati të caktuar nuk përmbushet marrëveshja e 14 tetorit".
Ndërsa, Curr Gjocaj ka arsyetuar vonesën e kryerjes së pagesës, duke thënë se vonesa e pagesës është vetëm për arsye teknike dhe " po punojmë vazhdimisht për realizimin e saj".
Nënkryetari i FSSHK-së, Jair Mulolli, është shprehur se gjatë takimeve të grupeve punuese, as kryeministri as ministri nuk e kanë paraqit si problem mungesën e mjeteve financiare.
" Vendimi i Këshillit Kombëtar ka qenë unanim dhe, nëse deri të hënën nuk realizohet marrëveshja, atëherë kërkesat e sindikatës do të jenë edhe politike. Dikush duhet të mbajë përgjegjësi për moszbatimin e marrëveshjes", tha ai. /Telegrafi/