Në ditën e Ulqinit që rëndom festohet, sot u protestua.
Nga ora 12:00 në këtë qytet bregdetar në vendin e njohur si Ranë, te Plazhi i Vogël në Ulqin u zhvillua protestë qytetare si reagim ndaj tentativës për dhënien me qira dhe privatizimin e hapësirave publike bregdetare për 100 vite.
Një numër i madh qytetarësh të Ulqinit janë mbledhur për të protestuar kundër asaj që ata e konsiderojnë si “shitjen e Ulqinit”.
Motoja e protestës është: Ulqini nuk është në shitje.
Duke folur për ‘RADIO 1’ nga protesta, ish/Ministri shqiptar i Qeverive properëndimore të Malit të Zi dhe kreu i Unionit Demokratik Shqiptar atje, Mehmet Zenka, ka deklaruar se shqiptarët janë kundër këtij apetiti të Qeverisë pro-serbe të Podgoricës dhe se shqiptarët do ta kundërshtojnë me të gjitha mjetet këtë veprim.
‘Shitjen e Ulqinit nga Podgorica zyrtare, shqiptarët nuk do ta lejojnë asnjëherë. Kjo që po ndodhë është apetit i Qeverisë serbomadhe të z.Spahiç në Podgoricë. Faktori politik shqiptar këtu në Ulqin, për herë të parë jemi bashkë. Dhe, mos harroni, sot protestë, por do të rrisim format e kundërshtisë dhe nuk garantojmë për mos eskalim. Podgorica është mësuar veç të marë nga Ulqini e asnjëherë nuk dha asgjë. Nuk e lejojmë dhe do ta shohin’, deklaroi Zenka për ‘RADIO 1’.