Ulëse që nuk ju lënë të flini gjatë vozitjes

Në një të ardhme të afërt, automjeti i juaj do të ketë të dhëna rreth pulsit tuaj dhe nëse nuk i pëlqejnë këto të dhëna, atëherë do të marrë kontrollin mbi automjetin për të penguar aksidentin eventual.

Projekti i ri i Universitetit Nottingham Trent në Britani të Madhe (duke përdorur çipin elektrostatik të ndjeshmërisë – ‘EPIC’), po merret me vendosjen e elektroautodiogramëve (ngjashëm me EKG) në ulëset e shoferëve për të përcaktuar pulsin dhe për të konfirmuar nëse vozitësi është tepër i lodhur për ta drejtuar automjetin.

Në bazë të kësaj teknologjie, ulësja regjistron pulsin dhe frymëmarrjen, mbikëqyr zgjuarsinë, lodhjen dhe shëndetin e shoferit.

Krijuesit e këtij sistemi shpresojnë se do të arrijnë ta integrojnë atë së bashku me sistemet e sigurisë, siç është ‘Cruise control’, për ta mbajtur automjetin në rrugë dhe sistemeve tjera që marrin kontrollin e makinës në raste të domosdoshme.

Kjo teknologji është akoma në fazën fillestare, ndërsa pritet që vendosja e parë e këtij sistemi të instalohet te kamionët, pasi shoferët e tyre kalojnë orë të tëra prapa timonit. /Telegrafi/