Pak ditë më parë, katër anëtarë të komunitetit shqiptar në SHBA, zhvilluan një video konferencë me të dërguarin e posaçëm të Shtëpisë së Bardhë për dialogun Kosovë-Serbi, Richard Grenell.
Uk Lushi, publicist, veprimtar i çështjes kombëtare, ish-luftëtar i UÇK, një prej pjesëmarrësve në këtë video konferencë, thotë se kanë marrë garanci nga i dërguari i Donald Trump se, SHBA nuk përkrah asnjë ndryshim të kufijve të Kosovës.
“Kemi kërkuar nga administrata amerikane që zëri ynë të dëgjohet. I kemi paraqitur z. Grenell mendimet dhe pikëpamjet tona, duke dashur që të influencojmë në pozicionimin e Shtëpisë së Bardhë. Mbajtëm qëndrime të qarta dhe sfiduese për z. Grenell. Një përmbledhje për atë çfarë ai tha është se, SHBA nuk përkrah asnjë ndryshim të kufijve të Kosovës, kurrë nuk ka thënë se do të ketë një afat të caktuar urgjent për zgjidhjen e domosdoshme të çështjes”, tha Lushi.
Ish-luftëtari i UÇK nënvizoi më tej se, Grenell gjithashtu i ka informuar se, Kina dhe Rusia nuk do të kenë pozicione të ngurta ndaj Kosovës, lidhur me anëtarësimin e saj në OKB.
Lushi shtoi më tej se, pritet që brenda pak javësh të mbahet takimi që ishte parashikuar më 27 qershor në Shtëpinë e Bardhë, duke thënë se SHBA nuk përfshihet se cilët do të jenë përfaqësuesit e Kosovës, por vetëm pret unitet sa më të gjerë.
“Nëse palët nuk arrijnë një pajtim nën patronazhin e Shtëpisë së Bardhë, atëherë Trump ka bërë të ditur se dialogu do të kalojë nga Shtëpia e Bardhë në DASH dhe duart e BE-së”, tha publicisti Lushi.
Lidhur me aktakuzën e ngritur ndaj Presidentit, Hashim Thaçi, ai tha se, me këtë veprim Gjykata Speciale ka vënë në pikëpyetje ekzistencën e vet.
“Gjykata Speciale i ka dhënë një goditje vetes. Prokurori është vetëm një palë. Ndërhyrje flagrante politike dhe ka humbur legjitimitetin. E shoh si goditje kundër Kosovës dhe kundër luftës çlirimtare dhe si një goditje direkte kundër SHBA dhe administratës së Donald Trump. Çfarë do të që të ndodhë me z. Thaçi, dialogu duhet vazhduar”, përfundoi Lushi. /Euronews Albania/