Ministri i Mbrojtjes, Ejup Maqedonci, ka bërë një vizitë në Poligonin Ushtarak në Babaj të Bokës, ku po zhvillohet ushtrimi fushor i Forcës së Sigurisë së Kosovës (FSK) i quajtur “Ujku i Çeliktë.”
Ai u shoqërua nga Komandanti i FSK-së, gjenerallejtënant Bashkim Jashari, dhe Shefi i Stafit të SHP, gjeneral brigade Ilir Qeriqi.
Vizita përfshinte edhe një ndalesë në kampin në fshatin Deve, ku janë të dislokuara njësitë e FSK-së.
Në kamp, komandantët e FSK-së, përfshirë gjeneral brigade Hysen Dreshaj dhe nënkolonel Jaser Mulla, prezantuan progresin e ushtrimit dhe përgatitjet ushtarake.
Qëllimi i ushtrimit “Ujku i Çeliktë” është të vlerësojë kapacitetet e Regjimentit të Dytë të Këmbësorisë dhe Togut të mbështetjes luftarake të Policisë Ushtarake, duke synuar të sigurojë gatishmërinë e tyre për përmbushjen e misionit të FSK-së./Telegrafi/
