Janë rreth 400 hektarë tokë në Gllogoc të Lipjanit që rrezikohen nga ujërat e zeza. Një pjesë e tyre tashmë është përmbytur nga rrjedha që ka marrë kanalizimi si pasojë e mbylljes së lumit që kalon midis fshatit.
Kjo gjendje ka shtyrë shumë banorë të kësaj ane të reagojnë dhe të kërkojnë nga autoritetet komunale veprim të shpejtë për të shpëtuar pronat dhe të mbjellat, shkruan Koha Ditore.
Gani Rrustemi është ndër ata që ka pronë të përmbytur në një pjesë arash të Gllogocit dhe ai të enjten brengosej për situatën që ka përfshirë këtë mjedis.
“Ujërat e zeza që vijnë edhe nga fshatrat fqinje nuk po derdhen në Sitnicë, por po shpërndahen nëpër arat tona si pasojë e mbylljes së shtratit të lumit. Nuk nevojiten shumë mjete për të hapur lumin, ndaj kërkojmë që ngutësisht të veprohet për të shpëtuar gjithë këto ara që disa prej tyre janë përmbytur nga ujërat e zeza”, ka thënë ai. /Telegrafi/