Ende pa mbushur një javë si futbollist i Manchester United ka probleme për sulmuesin kilian Alexis Sanchez.
Arsenal dhe Manchester United duhet të japin një shpjegim drejt Uefa-s pasi Alexis Sanchez mungoi në testin e anti-dopingut në fillim të javës, teksa kiliani po finalizonte një transferim te Djajtë e Kuq.
Sipas spanjolles Sport, trupi qeverisës i Evropës ishte në Londër në fillim të javës, por nuk u njoftua nga Topçinjtë se 29-vjeçari nuk do të ishte prezent për të dhënë gjak.
Dy klubet e Premier League – bashkë me dy herë fituesin e FA Cup – tani e kanë punën pisk, dhe duhet të shfaqen për një seancë dëgjimore të Uefa-s për të shpjeguar mungesën e ish-yllit të Barcelona-s.
Sanchez u konfirmua zyrtarisht si lojtari i United të hënën, në një shkëmbim me armenin Henrikh Mkhitaryan që shkoi në Emirates.
Por raportet nga Spanja pretendojnë se kiliani është zgjedhur nga Uefa për t’iu nënshtruar testeve të gjakut, dhe duhet të shpjegojë përse mungoi në kontrollin e dopingut.
Një lajm i hidhur për Sanchez, i cili pritet të debutojë me United ditën e premte ndaj Yeovil në FA Cup.