Telegrafi

Udhëtimi në Shtegun e Hekurt (Video)

Ekipi i Top Channel u prit nga shoqata e ngjitjes “Merimangat e Pejës”, për të qenë vizitorët e parë të “Via Ferrata” apo “Shtegut të Hekurt”.

Dy kilometra nga Peja, lumi Lumbardh, shpella, ujëvara e shumëllojshmëria e bimëve e madhështojnë bukurinë e Rugovës.

Për ngjitje në “Via Ferrata” duhet vetëm gjendje e mirë fizike, pajisje speciale dhe jo ndonjë stërvitje të veçantë. Shtegu i sigurt nis nga “Shpella e Mbretëreshës”.

“Via Ferrata” është e siguruar me fije të çelikta dhe shkallë në shkëmb, që u mundëson ngjitjen jo vetëm alpinistëve, por të gjithë vizitorëve.

Madhështia e Vargmaleve të Bjeshkëve të Nemuna vërehet më së miri, me adrenalinë të shtuar, në momentin e arritjes në fund të “shtegut të hekurt”.

Pas një pushimi të shkurtër në majë të shkëmbit bëhet kthimi në rrugën e njëjtë të ngjitjes. Për dy orë mund të përjetohet një eksperiencë dhe emocion i paharruar. “Via Ferrata” në Rugovë është e para në Ballkan.

“Duke marrë parasysh që është e para në Ballkan, presim që vitin tjetër të shtohet numri i turistëve dhe të zgjasim rrugën”, deklaron Nol Krasniqi nga grupi “Merimangat e Pejës”.

Ky projekt u mundësua nga shoqata e ngjitjes “Merimangat e Pejës” dhe ajo SAT nga provinca italiane e Trentos, e që në të ardhmen pritet të zgjatet si shteg. Sipas Komunës së Pejës, në këtë projekt me 50 për qind ka ndihmuar zyra e kryetarit Ali Berisha, apo me 11.500 euro.

Vendi më i njohur në botë për “Via Ferrata” janë Dolomitet në Itali. Për herë të parë u ndërtua gjatë Luftës së Parë Botërore me qëllim të mbrojtjes në Itali dhe Austri. /Top Channel