Udhëtimet gjatë festave të fundvitit do të rrisin përhapjen e variantit Omicron të Covid-19, edhe në mesin e të vaksinuarve plotësisht, thotë eksperti kryesor i sëmundjeve infektive në SHBA.
“Nuk ka dyshim për këtë, [Omicron] ka një aftësi të jashtëzakonshme për t’u përhapur”, citohet të ketë thënë Dr. Anthony Fauci për një program të NBC të dielën, përcjell Telegrafi.
Dr. Fauci, i cili këshillon qeverinë amerikane për pandeminë, tha se varianti tani ishte “tërbuar nëpër botë”.
Dhe siç vë në pah BBC, vendet po shtrëngojnë masat ndërsa varianti me mutacion të madh po përhapet gjithandej.
Në Evropë, Franca dhe Gjermania janë ndër ato që lëshojnë kufizime të udhëtimit dhe Holanda ka vendosur një bllokim të rreptë gjatë Krishtlindjeve.
Qeveritë po shtojnë gjithashtu programet e tyre të vaksinimit përforcues ndaj Covid-19 pasi studiuesit thanë se vaksina shtesë mund të sigurojë rreth 85% mbrojtje kundër sëmundjeve të rënda.
Të dielën, Dr Fauci tha se përhapja e shpejtë e Omicron në SHBA mund të ketë një ndikim serioz në shërbimet shëndetësore në të gjithë vendin.
“Spitalet tona, nëse gjërat duken sikur po duken tani, do të jenë shumë të ngarkuar”, paralajmëroi ai.
Andaj Dr. Fauci tha që njerëzit duhet të merrnin masa paraprake si mbajtja e maskave për fytyrën dhe distancimi social.
Ai gjithashtu u bëri thirrje më shumë amerikanëve që të marrin vaksinën dhe vaksinat e tyre përforcuese.
“Dallimi midis një personi të vaksinuar dhe me një dozë përforcuese që ka një infeksion, dhe dikujt që ka një infeksion që nuk është vaksinuar kurrë – është një ndryshim i madh në lidhje me rrezikun e ashpërsisë”, ka bërë të ditur ai.
Që nga fillimi i pandemisë, SHBA ka regjistruar më shumë se 50 milionë raste të coronavirusit dhe më shumë se 800,000 vdekje të lidhura me Covid-19. /Telegrafi/