Leidy Johana Díaz nga Kolumbia që ishte shtirur si infermiere, është filmuar nga kamerat e sigurisë duke e vjedhur një foshnje nga prindërit e saj në një spital në Bogota.
E veshur si infermiere, i kishte thënë nënës dhe babait të vajzës së vogël se duhet ta dërgojë në zyre tjetër për të kryer disa analiza, transmeton Telegrafi.
Foshnjën e porsalindur e futi nën xhaketë dhe u nis drejt dyerve të spitalit. Megjithatë, prindërit dhe stafi i spitalit e kuptuan se bëhet fjalë për mashtrim dhe alarmuan autoritetet kompetente.
Ajo u kap nga sigurimi i spitalit para se të arrinte të largohej nga objekti, pasi me kohë kishin aktivizuar protokollin e sigurisë.
“Kjo grua kaloi pikën e parë të kontrollit, por kur mbërriti te rojtari i fundit u ndal për t’ia kontrolluar çantën, ku edhe vërejti se po mbante diçka. Kur është pyetur se çfarë ka, ajo u rikthye brenda”, ka deklaruar inspektori Wilson Silva.
Pa kaluar shumë kohë është arrestuar, kurse foshnja i është kthyer prindërve. Siç raportojnë mediat lokale, ajo ishte veshur si infermiere në të njëjtin spital gjatë nëntorit të vitit të kaluar. /Telegrafi/