Një prezantuese e lajmeve e vlerësuar me çmime në Turqi, Meltem Günay, u pushua nga puna pasi u shfaq në kamera me një filxhan Starbucks në tryezën e saj, gjë që u interpretua si një akt provokues në një vend ku kompania me seli në Seattle shihet si pro-izraelite.
Prezantuesja 45-vjeçare e lajmeve me TGRT Haber dhe drejtori i programit u pushuan menjëherë pas transmetimit të së dielës, transmeton Telegrafi.
Kompania mediatike me seli në Stamboll, tha se “kupton dhe i njeh ndjeshmëritë e popullit turk në lidhje me Gazën dhe i mbron ata deri në fund”.
“Nuk e miratojmë këtë sjellje të prezantuesve dhe drejtorëve të cilëve u është anuluar kontrata e punës dhe i dënojmë ashpër”, thuhet në njoftimin e televizionit.
Qytetarët në Turqi kanë bojkotuar Starbucks në të gjithë vendin javët e fundit, për shkak të njëanshmërisë pro-izraelite të kompanisë, shkruan New York Post.
Përdoruesit e mediave sociale kanë shpërndarë videon virale, që tregojnë njerëz që protestojnë jashtë vendndodhjeve të Starbucks dhe kërkojnë që klientët të qëndrojnë larg prodhuesit. /Telegrafi/