Në media është raportuar se në Ministrinë e Ambientit, janë përfshirë në një zënkë fizike kryeshefi i i Agjencisë për Mbrojtjen e Mjedisit, Ilir Morina bashkë me Fatmir Morinën që është drejtor i drejtorisë së Parkut Nacional “Bjeshkët e Nemuna”.
Mirëpo ndaj këtij lajmi ka reaguar krye-shefi i i Agjencisë për Mbrojtjen e Mjedisit, Ilir Morina i cili ka thënë se nuk ka pasur asnjë zënkë me të lartë cekurin Fatmir Morinën.
Në një përgjigje dhënë Telegrafit, ai ka thënë se është i habitur se nga kanë dalë këto lajme.
“Nuk ka asgjë të vërtetë. Tani jam duke pirë limonadë me Fatmirin. Nuk e di nga kanë dalë këto lajme. Ne dje e kemi pasur një takim për një plan i cili ka qenë shumë konstruktiv. Kemi qenë në takim pesë persona por nuk ka pasur as përleshje verbale. Ne punojmë bashkë çdo ditë, kemi telashe të shumta në punë por, nuk kemi pasur as një konflikt sepse aty nuk kemi tokë të babës me nda. Po ashtu edhe Ministri na thirri , dhe edhe ai është i befasuar për këtë. Ky është spekulim”, ka thënë ai.
Morina madje në një status në llogarinë e tij në Facebook, ka postuar një fotografi ku shihet i shoqëruar me Fatmir Morinën.
“Një limonadë me drejtorin e parkut. Lajmi i shpërndarë në portale i pa vërtetë! Lajmi është një spekulim”, ka shkruar ai në Facebook./Telegrafi/