Dy shqiptarë të cilët në muajin korrik ishin arrestuar në një arë misri në Suhr (Kantoni Aargau) po dyshohen për vjedhje me grabitje në gjithsej 47 raste. Kështu pohon Prokuroria Shtetërore e Kantonit Aargau, shkruan azonline.ch.
Dy të rinjtë, 26 dhe 27 vjeçarë janë arrestuar në mëngjesin e 26 korrikut, gjatë një aksioni kërkimi të policisë, derisa ata ishin fshehur në një arë të mbjellë me misër.
Hetimet e mëtejme të Policisë së Kantonit dhe të Prokurorisë përkatëse kanë sjellë në përfundimin se dy personat në fjalë mund të jenë përgjegjës për një numër të madh vjedhjesh, transmeton albinfo.ch.
Kështu, 26 vjeçari dyshohet se ka kryer 23 raste vjedhjeje gjegjësisht tentime për vjedhje. 13 prej tyre i ka bërë në Kantonin e Solothurnit. 10 të tjerat ai dyshohet t`i ketë kryer në bashkëveprim me një person tjetër, në mes 24 dhe 26 korrikut, në Aargau, ku dhe është kapur më 26 korrik. Ky person ka pranuar në tërësi veprën.
Nga ana tjetër, personi i dytë, po ashtu shqiptar, 27 vjeçari ka pranuar vetëm pjesërisht atë që i ngarkohet. E ai ngarkohet për 24 vjedhje dhe tentime për vjedhje.
Prokuroria në komunikatën e saj thotë se hetimet nuk janë përmbyllur ende, përcjell albinfo.ch. Po ashtu ajo nuk jep shifra mbi shumat e vjedhura.
Gjykata e ka miratuar kërkesën e Prokurorisë dhe dy personave në fjalë ua ka shtuar masën e paraburgimit për tre muaj të tjerë.