Presidenti turk Recep Tayyip Erdogan dhe homologu i tij rus Vladimir Putin, kanë njoftuar se kanë arritur marrëveshje për një armëpushim në Idlib që fillon nga mesnata. E gjitha u arrit pas një takimi në Moskë që zgjati gjashtë orë.
Idlib, kështjella e fundit rebele në Siri, ka parë luftime të ashpra kohët e fundit në mes të një sulmi sirian të mbështetur nga Rusia për të rimarrë kontrollin mbi rajonin, duke rezultuar në atë që Turqia dërgoi mijëra trupa në krahinë për të zmbrapsur ushtrinë siriane, transmeton Telegrafi.
Erdogan u tha gazetarëve në Moskë të enjten se Turqia nuk do të “heshtë” kundër sulmeve nga forcat e qeverisë siriane, duke paralajmëruar që Ankaraja do të hakmerret kundër sulmeve me forcë të plotë.
Nga ana e tij, Putini tha që Rusia jo gjithmonë pajtohej me partnerët e saj turq, por shprehu shpresë se marrëveshja do t’i jepte fund vuajtjeve civile dhe do të ndihmojë në kontrollin e një krize humanitare.
Marrëveshja gjithashtu parashikon krijimin e një korridori të sigurisë 12-kilometër (7-milje) në të gjithë vendin përgjatë autostradës M4. Korridori do të patrullohet së bashku nga trupat ruse dhe turke, duke filluar nga 15 mars. /Telegrafi/