Ankaraja ka nisur hetimet pasi doli se personi i dyshuar për sulmin terrorist të xhamisë së Zelandës së Re vizitoi Turqinë dy herë, kështu ka thënë një zyrtar turk.
Ekstremisti i djathtë i armatosur me armë gjysmë-automatike hyri në dy xhamitë në qytetin e Christchurch gjatë namazit të së premtes dhe vrau 50 persona dhe dhjetëra të plagosur.
Sipas Al Jazeera, përcjell Telegrafi, australiani Brenton Tarrant, 28-vjeçar, i cili është arrestuar dhe akuzuar për vrasje në Zelandën e Re, kishte vizituar Turqinë ku kishte “qëndruar për një kohë të gjatë”, tha zyrtari turk pa dhënë detaje tjera.
“Ne mendojmë se i dyshuari mund të ketë qenë në vende të tjera (nga Turqia) në Evropë, Azi dhe Afrikë. Ne po hetojmë lëvizjet dhe kontaktet e të dyshuarve në vend”, shtoi zyrtari, duke folur nën kushte anonimiteti.
Mediet turke njoftuan se një manifest i botuar në internet nga i arrestuari përmbante referenca specifike për Turqinë dhe çrrënjosjen e xhamisë së Aja Sofija në Stamboll dhe minaret e saj. Xhamia tani muze, dikur ishte kishë para se të shndërrohej në xhami gjatë Perandorisë Osmane.
Edhe Sofja ka thënë se po hetonte lëvizjet e australianit që është arrestuar për vrasje pasi kishte vizituar Bullgarinë në nëntor të vitit 2018.
“Një turist, që besohet të jetë Brenton Harrison Tarrant, kaloi një javë në Bullgari dhe supozohet që ka vizituar vendet historike me qëllim që ta studionte historinë e vendit ballkanik”, tha kryeprokurori i Bullgarisë, Sotir Tsatsarov.
Ai tha se hetimi do të përcaktojë nëse kjo ishte “e saktë ose nëse ai kishte objektiva të tjera”.
Gjithashtu, i njëjti person bëri një vizitë të shkurtër në Ballkan në dhjetor të vitit 2016, duke udhëtuar me autobus nëpër Serbi, Kroaci, Mal të Zi dhe Bosnje dhe Hercegovinë. /Telegrafi/