Që kur presidenti amerikan, Joe Biden, njoftoi se po tërhiqet nga gara presidenciale, Donald Trump ka filluar me reagime në rrjetin e tij Truth Social.
Në njërin prej postimeve, Trump pyet se kush po e drejton kombin dhe shprehet se “Biden nuk mund ta drejtojë vendin”.
Gjithashtu, ai e cilëson Bidenin si “kërcënim për demokracinë”.
“Joe Biden do të zgjohet dhe do të harrojë se u largua nga gara”, tha Trump në një tjetër postim.
Siç raportohet, postimet e tij kanë marrë tonin e komenteve dhe postimeve të mëparshme në formë fyerje që jemi mësuar të shohim nga ish-presidenti, shkruan skynews, përcjell Telegrafi.
Në fillim të këtij viti, ai e emërtoi rastin e tij të parave të heshtura në New York si “rasti i gjuetisë së shtrigave Biden Manhatttan”.
Trump ndër tjera u tha gazetarëve se “vendi është një rrëmujë”, duke pretenduar se zgjedhjet e mëparshme ishin “të rreme”.
Dhe vitin e kaluar, disa orë pasi ai u deklarua i pafajshëm për 37 akuza federale në Miami, ai sulmoi kundërshtarët e tij politikë në një fjalim gjatë një tubimi për mbledhjen e fondeve në New Jersey.
Në mesin e figurave që ai sulmoi ishin personalitete të shquara publike, duke përfshirë Bill dhe Hillary Clinton, Joe Biden dhe familjen e tij.
Ndryshe, Biden është përballur me thirrje në rritje javët e fundit për të hequr dorë nga gara për të drejtuar vendin edhe për një mandat.
Udhëheqësi amerikan do të qëndrojë në detyrë deri pas zgjedhjeve dhe ka thënë se do të “përqendrohet vetëm në përmbushjen e detyrave si president për pjesën e mbetur të mandatit”. /Telegrafi/