Presidenti amerikan, Donald Trump tha të dielën në një telefonatë për një grup mbështetësish se ai ishte “testuar plotësisht negativ” për coronavirus.
Një deklaratë e tij, sipas mediave të huaja, përcjell Telegrafi, vjen pavarësisht se mjeku i Shtëpisë së Bardhë, Dr. Sean Conley, nuk ka lëshuar asnjë deklaratë të re mbi shëndetin e presidentit.
“Unë jam testuar plotësisht negativ”, tha Trump në një mesazh audio të fushatës së tij, të postuar në YouTube. “Unë do të jem nesër në Florida, duke punuar shumë fort sepse këto janë zgjedhje që duhet t’i fitojmë”.
Pavarësisht pretendimit të Trump se ai ka rezultuar negativ për virusin, Shtëpia e Bardhë nuk ka lëshuar asnjë informacion që kur Conley të shtunën tha se presidenti nuk ishte më në rrezik të transmetimit të coronavirusit.
Megjithatë, Conley nuk tha në mënyrë të qartë nëse Trump kishte dalë negativ në ndonjë test për coroanvirus.
Komentet e presidentit për mbështetësit erdhën vetëm disa orë pasi Trump për Fox News tha se ai ishte “imun” nga virusi.
“Unë jam imun”, tha Trump. “Presidenti është në gjendje shumë të mirë për të luftuar betejat”. /Telegrafi/