Media prestigjioze “Reuters” i ka kushtuar një artikull emigrantëve afganë të strehuar në Shqipëri, të cilët janë prekur nga urdhri ekzekutiv i presidentit të ri amerikan, Donald Trump, për pezullimin e ndihmës për rivendosjen e refugjatëve.
Sipas raportimit, qindra afganë të bllokuar në vende transiti si Shqipëria ndodhen në një gjendje të rënduar pasigurie.
“Reuters” thekson se e ardhmja e tyre mbetet e paqartë, ndërsa thirrjet për ndihmë janë një kujtesë e nevojës për mbështetje humanitare dhe për zgjidhje globale të çështjeve të migracionit dhe refugjatëve.
Në artikull përshkruhen rastet konkrete të afganëve të strehuar në Shqipëri, të cilët kishin rezervuar fluturime për të vijuar drejt destinacioneve të tyre, por u bllokuan pas vendimit të Trump për pezullimin e ndihmës.
“Nuk e di nëse do të hipim ndonjëherë në atë avion dhe nëse po, nëse do të shkoj në Kabul apo në Shtetet e Bashkuara. Nëse kthehemi në Afganistan, do të na vrasin, sepse për talebanët ne jemi në thelb amerikanë dhe armiqtë e tyre numër një, pasi kemi punuar krah për krah me amerikanët,” tha Amini, një emigrant i strehuar në Shëngjin, një qytet bregdetar në veri të Shqipërisë.
Një tjetër afgan, i cituar nga “Reuters”, i bëri thirrje Trump. “Zoti Trump, mos na dërgoni te thikat e kasapit në Kabul.”
Ndërkohë, raportet e misionit të OKB-së në Afganistan tregojnë se talebanët kanë arrestuar, torturuar dhe vrarë ish-ushtarë dhe zyrtarë të qeverisë së mëparshme të mbështetur nga SHBA.
Këto raportime shtojnë edhe më shumë shqetësimin për fatin e emigrantëve të bllokuar në vendet e tranzitit, si Shqipëria.