Presidenti Donald Trump ka bërë të ditur emrat e një grupi të cilët do të shërbejnë në Bordin Këshillimor të Presidentit për Inteligjencën (PIAB).
Sipas një njoftimi nga Shtëpia e Bardhë, këta individë do të këshillojnë Presidentin mbi sfidat më të rëndësishme të sigurisë së kombit amerikan dhe do të sigurojnë që Komuniteti i Inteligjencës po punon për të çuar përpara agjendën e tij “America First”, përcjell Telegrafi.
Po sipas njoftimit, të emëruarit nga PIAB nga Presidenti përfaqësojnë një gamë të gjerë eksperience dhe intelekti që do të ndihmojë në rivendosjen e integritetit në Komunitetin të Inteligjencës.
Dhe ndër emrat e përmendur është edhe ai i Robert O’Brien.
I am honored to have the opportunity to serve President @realDonaldTrump and our nation again. https://t.co/TFa9Zbx9oo
— Robert C. O’Brien (@robertcobrien) February 12, 2025
Bëhet fjalë për njeriun i cili gjatë mandatit të parë të Trump kishte qenë këshilltar për siguri kombëtare dhe bashkë me Richard Grenell ishin marrë edhe me procesin e dialogut Kosovë-Serbi dhe marrëveshjen e Uashingtonit.
O’Brien ka shkruar se është i nderuar që të ketë mundësinë për t’i shërbyer presidentit Trump dhe kombit amerikan përsëri.
Kujtojmë se Donald Trump ka emëruar së fundmi Richard Grenellin, si drejtor ekzekutiv të përkohshëm të Qendrës John F Kennedy për Artet Performuese në Uashington.
Bëhet fjalë për 58-vjeçarin i cili kohëve të fundit ka shërbyer si i dërguar i presidentit për misionet speciale dhe ishte i përfshirë në sigurimin e lirimit të amerikanëve të ndaluar në Venezuelë. /Telegrafi/