Komisioni Amerikan për Debatet Presidenciale synon të ndryshojë formatin e debatit në mënyrë që të shmanget përsëritja e takimit të parë kaotik midis Donald Trumpit dhe Joe Bidenit.
Komisioni tha se debati i mbrëmshëm, “tregoi qartë” se formati i debateve të mbetura kishte nevojë për “strukturë shtesë për të siguruar një diskutim më të rregullt”, raporton CNN.
Një nga mundësitë që po merret në konsideratë është që moderatori të autorizohet t’ia mbyll mikrofonin pjesëmarrësit në debat ndërsa kundërshtari i tij po flet, transmeton Telegrafi.
Debati i parë midis presidentit aktual të SHBA-ve, Trump dhe kandidatit demokrat, Biden, u shënua nga një atmosferë kaotike, me ndërhyrje të shpeshta në fjalën e bashkëbiseduesit, akuza dhe fyerje personale.
Moderatori i debatit, gazetari i Fox News-it, Chris Wallace, nuk arriti të vendoste kontroll mbi diskutimin.
Deri në zgjedhje, dy debate të tjera presidenciale do të mbahen, më 15 tetor në Miami dhe më 22 tetor në Nashville. /Telegrafi/