Klubi basketbollist nga Mitrovica, Trepça sot ka mësuar kundërshtarët në kualifikimet e Ligës së Kampionëve.
Në turneun kualifikues, Trepça do të përballet me skuadrën e Keravnos (Qipro), ndërsa fituesi i këtij takimi luan në gjysmëfinale kundër kampionit të Çekisë, Nymburk, shkruan Telegrafi.
“Nëse arrin në finale, Trepça do të luajë përballë fituesit nga takimet në mes të: Kutaisi (Gjeorgji), Levice (Sllovaki) e Kalev/Cramo (Estoni)”, ka njoftuar Federata kosovare e Basketbollit.
Katër turnetë e raundit kualifikues do të zhvillohen midis 15 shtatorit dhe 22 shtatorit. Ndërsa, orari i detajuar i ndeshjeve, si dhe vendi i zhvillimit, do të shpallen në korrik.
“Në kualifikime janë 24 skuadra që do t’i bashkohen 28 skuadrave që tashmë janë përcaktuar për edicionin e ri”, thuhet në njoftim.
Bëhet e ditur se edicioni i ri do të fillojë më 1 tetor 2024. /Telegrafi/
