“ Shuma e tërësisë së premiumeve të pranuara nga kompanitë e sigurimeve në vitin 2007 ka arritur vlerën prej 50.8 milionë euro, e cila është një rritje vjetore prej 4.3%”, thuhet në raportin vjetor të Bankës Qendrore të Kosovës.
Sipas saj, veprimtaria e kompanive të sigurimeve vazhdon të përqëndrohet kryesisht tek polisat PPT, të cilat kanë gjeneruar 68.7% të tërësisë së premiumeve të pranuara, përderisa premiumet e pranuara nëpërmjet polisave kufitare janë llogaritur për 20.0%.
Polisat e tjera të sigurimeve vullnetare janë në nivel shumë të ulët dhe paraqesin 11.3% të tërësisë së premiumeve të pranuara.
Po ashtu sipas raportit tregu i sigurimeve në Kosovë është i dominuar nga kompanitë e jashtme edhe për sa u përket mjeteve, duke paraqitur 69.7% të tërësisë së mjeteve të kompanive të sigurimeve.
“Tregu i sigurimeve në Kosovë kryesisht operohet nga tri kompanitë më të mëdha, të cilat kanë menaxhuar 48.6% të tërësisë së mjeteve të kompanive të sigurimeve “.
Mjetet e kompanive të sigurimeve sipas raportit kanë arritur vlerën prej 70.8 milionë eurosh në vitin 2007, që paraqet 12.5% më shumë se në vitin 2006.
Rritja e tyre kryesisht drejtohet nga depozitat me afat, të cilat janë rritur për 38.9%, duke arritur vlerën prej 40.6 milionë eurosh.
Rritja e këtyre mjeteve është financuar kryesisht nga ekuiteti i aksionarëve, i cili ka regjistruar një rritje vjetore prej 15.6% në vëllim. /Telegrafi/