Rrjeti Ballkanik për Gazetari Hulumtuese (BIRN) ka prezantuar sot raportin “Tregime nga rrenat” lidhur me dezinformimin në Kosovë, origjinën e tij, efektet dhe shpërndarjen.
Kreshnik Gashi, bashkautor i raportit ka thënë se në Kosovë ka dezinformata të shumta, që kryesisht vijnë nga Kina dhe Rusia, transmeton Telegrafi.
“Të dhënat kanë tri burime të informacionit. Nëse do të analizonim të gjitha dezinformatat do të publikonim raport mbi 1 mijë faqe. Elementi parë ka qenë më identifiku 41 fjalë që janë dezinformata. Këto 41 fjalë na kanë dalë që janë përdorur në 10 mijë herë në rrjetet sociale. Kemi identifikuar narrativat kryesore që janë përmend, një pjesë e tyre janë shpërnda edhe pa vetëdije nga njerëz. Raporti identifikon se Kosova është e brishtë, dhe nuk ka kapacitete për tu përballur me dezinformatat që vijnë nga Rusia”, u shpreh ai.
Gashi deklaroi se Kosova nuk kapacitete dhe është shumë e brishtë prej ndikimit që mundet me ardhë prej Kine.
“Të dhënat kryesore tregojnë se influenca e tyre po mbërrin më ndiku në Kosovë. Dezinformata që vjen prej Rusie, konsiderohet si e vërtetë në Kosovë. Narrativa kryesore është kundër NATO-s, e dyta është kundër integrimit në Bashkimin Evropian. Influenca ruse synon me nxit një luftë brenda Kosovës. Po ashtu, edhe narrativa kineze shpërndahet në Kosovë. Ka narrative që synon të nxitet një luftë”, pohoi mes tjerash ai.
Pas publikimit të raportit, u mbajtë edhe një diskutim në panel, ku pjesëmarrës ishte edhe kryeredaktori i Telegrafit, Muhamet Hajrullahu.
Hajrullahu ka thënë se nuk mund të thuhet se të gjitha mediat bëjnë dezinformata, duke shtuar se në Kosovë ka media profesionale.
“Redaksitë nëse duan të kenë një aspekt professional, duhet fillimisht të punësojnë njerëz që ruajnë me xhelozi aspektin gazetaresk, profesionistë edhe i kanë parimet profesionale. Nëse gazetarët nuk kanë parime, dezinformatat natyrisht që janë pjesë e çdo diskursi që mund të ndodhë”, u shpreh ai.
Gjatë diskutimit, Hajrullahu tha se punonjësit e mediave duhet t’u përmbahen rregullave profesionale gjatë raportimit si KMShK-së e KMP-së.
“Gazetarët e mediat viteve të fundit edhe pa dashje mund ta bien pre e një dezinformatë. Nuk mund të themi të gjitha mediat bëjnë dezinformata. Ne duhet t’u përmbahemi rregullave profesionale. Ne në Telegrafi kemi vendosur të citojmë burimin kredibil, kur kemi shkruar për COVID-19 kemi cituar mediat botërore kredibile…”, tha ndër tjera ai.
Hajrullahu theksoi tutje se “dallimi mes mediave profesionale është se pret komunikimin zyrtar, por shpesh-herë komunikimi zyrtar është në ‘gjumë’. Një media kredibile duhet të raportojë nga vendi ngjarjes, ose të thirret në burime të veta”.
Në anën tjetër, Jeton Mehmeti, kryetari i Komisionit të Pavarur të Mediave ka thënë se kanë mbi 200 subjekte që licencojnë, ku bëjnë mbikëqyrjen edhe mund t’i sanksionojë.
“Qytetarët duhet të kenë informata më të sakta mbi pronarët e tyre, qytetarët duhet pasur një pasqyrë të qartë se kush është pronar. Do të miratojmë rregulloren e re. Pronësia e huaj nuk do të ndalohet, por do të kalojnë disa filtra, në mënyrë që të ndalojmë investime nga disa shtete të dyshimta. Deri tani ka pasur liri të plotë për të huajt, tani investitorët e huaj do të kenë disa kufizime”, tha Mehmeti. /Telegrafi/
