Tre shtetas të Maqedonisë janë në paraburgim, pasi të martën në vendkalimin kufitar në Sllavonski Brod kanë tentuar të kontrabandojnë pothuajse 6.5 kilogramë heroinë, çmimi i së cilës vlerësohet të jetë mbi 100.000 euro. informoi sot policia kroate.
Gjatë kontrollit kufitar, policia të martën në orën 19 ka dyshuar në lejen e vozitje së personit 40-vjeçar që ka drejtuar veturën me targa të Maqedonisë. Në veturë kanë qenë edhe dy shtetas të Maqedonisë, një burrë 40 vjeçar dhe një grua 30 vjeçare, përcjell Telegrafi Maqedoni
Policia ka konstatuar se leja e vozitjes është e falsifikuar dhe së bashku me doganierët kanë filluar të kontrollojnë veturën, meç’rast në pjesën e poshtme janë gjetur paketa të dyshimta.
“Me urdhër të Gjykatës së Zhupanit është kryer bastisja e veturës, ku janë gjetur 24 paketa, me gjithsej 6.449 gramë heroinë, për të cilin supozohet se është dedikuar për tregun e Evropës Perëndimore”, thuhet në kumtesën e policisë kroate.
Të gjithë janë arrestuar dhe kundër tyre është ngritur padi penale për shkak të prodhimit të paautorizuar dhe qarkullim të mjeteve narkotike./Telegrafi/