Tre persona vdiqën dhe tetë u lënduan rëndë të mërkurën kur një tren ekspres nga Mynihu në Pragë kaloi përmes një sinjali ndalimi dhe u përplas me një tren lokal udhëtarësh në Republikën Çeke, thanë autoritetet çeke.
Sipas CNN, përcjell Telegrafi, disa pasagjerë u dërguan me helikopterë në spitale nga vendi i përplasjes pranë fshatit perëndimor çek të Milavce, tha shërbimi rajonal i shpëtimit. Pesëdhjetë njerëz pësuan lëndime më të lehta që nuk kërkojnë trajtim të menjëhershëm.
Një zëdhënëse e policisë tha se tre persona kishin vdekur. Ajo nuk mundi t’i konfirmojë raportet e medieve lokale ku thuhej se viktimat ishin shoferët e dy trenave dhe një pasagjer.
“Ex 351 kaloi përmes një sinjali që tregon ‘Stop’… dhe u përplas me një tren pasagjerësh”, tha ministri i Transportit Karel Havlicek në Twitter, duke iu referuar trenit ekspres.
Trenat u përplasën pak pas orës 8 të mëngjesit pranë Milavce, 140 kilometra në jugperëndim të kryeqytetit Pragë. /Telegrafi/
