Travis Scott është kritikuar nga familja e viktimës më të re të tragjedisë në “Astroworld”, pasi u pa me makinën e tij luksoze prej 5.5 milionë dollarësh (5.2 milionë euro).
Dhjetë njerëz u vranë dhe mijëra u plagosën në rrëmujën në koncertin e Scott në festivalin e muzikës “Astroworld” në nëntor 2021 përfshirë 9-vjeçarin, Ezra Blount.
Familja e Ezrës e paditi Scottin përpara se fëmija të vdiste nga plagët e tij dhe të tjerët e pasuan, duke çuar në një mori padish.
Megjithatë, ndërsa paditë grumbullohen, Scott duke ecur me Bugatti Veyron Chiron Super Sport prej 5.5 milionë dollarësh po shkakton reagime pasi avokati i familjes i quan blerjet luksoze të reperit ‘të tepërta’.
Bob Hillard, avokati i familjes tha për TMZ se Ezra do të ishte ende gjallë sot, duke shijuar verën e tij, nëse Scott do të kishte shpenzuar gjysmën e asaj që pagoi për Bugattin për masa të thjeshta sigurie në festivalin vdekjeprurës të muzikës.
Por një zëdhënës i Scott tha për TMZ se makina e përmendur ishte blerë në vitin 2020 – përpara tragjedisë “Astroworld’, shkruan DailyMail.
“Makina e përmendur u ble në vitin 2020 (shumë përpara ngjarjeve tragjike në Astroworld) dhe u mbulua gjerësisht nga media – përfshirë TMZ – në atë kohë. Paraqitja e gabuar e një blerjeje makine dyvjeçare për të bërë një sulm të paprovokuar dhe të pajustifikuar ndaj Travis Scott nuk është gjë tjetër veçse një tjetër marifet publicitar i dëshpëruar për të tentuar të fajësosh në mënyrë të rreme Travisin dhe të manipulosh qëllimisht opinionin publik, gjë që nuk do të funksionojë” thuhet në deklaratën e tyre.
Dhjetë njerëz u vranë dhe më shumë se 4,900 njerëz u plagosën në rrëmujën në koncertin e Scott-it vitin e kaluar
Një grua që thotë se e humbi shtatzëninë si pasojë e lëndimeve të marra gjatë përplasjes së turmës në festival, po padit gjithashtu Scott dhe organizatorët për vdekjen e foshnjës së saj të palindur.
Shanazia Williamson dhe bashkëshorti i saj, Jarawd Owens nga Ohio, thonë se ishin në pritje të një fëmije kur morën pjesë në festivalin “Astroworld’ më 5 nëntor 2021.
Në dhjetor, Williamson dhe Owens ngritën padi kundër Scott, promovuesve të festivalit Live Nation dhe ScoreMore, kompanive të sigurisë Valle Services SMG dhe ASM Global, dhe korporatës Harris County Sports and Convention.
“Ndërsa ishte e pranishme në festival, Shanazia u shkel dhe u shtyp dhe rezultoi në lëndime të tmerrshme dhe përfundimisht vdekjen e fëmijës së palindur të saj dhe Jarawd-it”, thuhet në padi, “Përveç kësaj, Shanazia pësoi lëndime në shpatull, shpinë, këmbë, gjoks, stomakun dhe pjesët e tjera të trupit të saj”.
Padia gjithashtu pretendon se të pandehurit nuk ofruan personelin e duhur të sigurisë ose mjekësor dhe se ata nuk arritën të njihnin rreziqet e organizimit të ngjarjes.
Padia e Williamson dhe Owens është një nga qindra të paraqitura kundër Scott dhe kompanive të përfshira në festival.
Scott, labeli i tij Cactus Jack, Live Nation, ScoreMore, Apple, kompanitë e sigurisë së festivalit dhe vetë vendi i ngjarjes përballen me miliarda dollarë dëme nga njerëzit e lënduar në festival.
Incidenti vdekjeprurës shkaktoi probleme të panumërta ligjore për Scott, si dhe reagim të fortë publik për trajtimin e supozuar të tij të incidentit vdekjeprurës.
Ai u largua si titullar i “Coachella 2022”, si dhe titullar për festivalin “Day N Vegas” vitin e kaluar.
Live Nation dhe kompania kryesore e sigurisë në festival, Contemporary Services Corporation, kanë mohuar të gjitha akuzat kundër tyre.
Vetë Scott ka mohuar vazhdimisht çdo përgjegjësi për tragjedinë në Astroworld.
Ai do të kryesojë festivalin “Primavera Sound” nëntorin e ardhshëm dhe do të luajë tre shfaqje, me këngëtaren nga Zelanda e Re, Lorde të planifikuar në formacion përpara tij. /Telegrafi/