Manchester City do të jetë pa nënshkrimin e ri të ekipit, Benjamin Mendy, për fillimin e sezonit të Ligës Premier pasi është zbuluar se ai ka kryer një ndërhyrje kirurgjike pas një dëmtimi më kofshë dhe pritet të mungoj deri në tre javë.
23-vjeçari francez më në fund e përfundoi lëvizjen e tij në Etihad nga Monaco në një marrëveshje prej 49.3 milionë funteve apo rreth 60 milionë euro.
Ai kaloi testet mjekësore, por nuk u paraqit në fitoren 4-1 të Cityt ndaj Real Madridit në Los Angeles në “International Champions Cup”.
Dhe pas kësaj, trajneri i Cityt, Pep Guardiola zbuloi se mbrojtësi mungoi për shkak të një ndërhyrjeje pas një dëmtimi të kofshës që e ka nga koha e Krishtlindjeve.
“Për fat të keq ai është pak i lënduar dhe nuk është gati për dy apo tre javët e ardhshme”, ka thënë Guardiola.
Kjo do të thotë se reprezentuesi francez nuk ka gjasa të jetë i aftë për ndeshjen hapëse të sezonit të ri të Ligës Premier ndaj Brightonit më 12 gusht. /Telegrafi/