Ky sesion ka qenë interaktiv dhe ka pasur lidhje direkte të të pranishmëve në Prishtinë me ekspertë mjekësorë nga Britania e Madhe, duke adresuar mënyrat e diagnostikimit dhe menaxhimit klinik të rasteve të prekura nga Gripi A (H1N1).
Nga Prishtina, sesioni është drejtuar nga Nedim Jaganjac, specialist i lartë i shëndetit nga Banka Botërore, ndërsa udhëheqës nga Britania i sesionit ka qenë Kevin Rooney, specialist në Anesteziologji dhe mjekimin intensive në Royal Alexandra Hospital në Paisley-Skoci. Gjatë sesionit, lidhje e debate janë bërë edhe me Shqipërinë, Kroacinë, Bosnjë Hercegovinën, Maqedoninë, Malin e Zi, Serbinë e Turqinë.
Pjesëmarrës nga Qendra Emergjente dhe Klinika Infektive e QKUK-së, kanë trajtuar së bashku me përfaqësuesit e Bankës Botërore dhe të Organizatës Botërore të Shëndetësisë katër tema kryesore: menaxhimin klinik të rasteve me H1N1, gatishmërinë e spitaleve, ndikimi në shëndetin animal, komunikimi dhe zbutja e rrezikut.
Një sesion tjetër do të mbahet edhe nesër, ndërsa kjo po zhvillohet në kuadër të një misioni të Bankës Botërore, i cili po qëndron në Kosovë për disa ditë për të mbikëqyrë situatën rreth kontrollit të Gripit A (H1N1) dhe përgjigjen ndaj pandemisë.